المشهد
الأول :
يجلس
محجوب ودفع الله على كراسي حديدية عند عتبة باب بيت محجوب , كل يوم في
هذا الوقت
يجتمعان في نفس المكان ليناقشا نفس المواضيع , بنفس الطريقة , بنفس
الجمل
والعبارات , كل يوم يجلسان وأمامها القهوة المعدة خصيصاً لهما , كلاهما
مصاب ب "متلازمة
"عدم الشغلة " ..أحياناً يغيران الجو العام قليلاً
ليتحدثا عن أمر طرأ
ويضعان الحلول وهي حلول لا تتجاوز الكراسي الحديدية التي يضعها
ثقل جسديهما
عليها ..
- - أنت عارف يا محجوب ...أنا أحياناً بفكر لو السودان دا كان "زول
" ..قصدي بيتكلم كان اتكلم عن شنو ..؟؟
- - لو السودان كان زول ؟؟؟؟!!!! كلامك عجيب لكن !!!
- -لا ما عجيب , جاريني بس ...أنت عارف كل يوم من فترة طويلة ما بفكر غير
في الموضوع دا ...تقول كان حيقول شنو ؟
- - والله أنت كان كدا زول فاضي جد ,لكن سؤال وجيه بيني وبينك , والله
أظنو كان قال كلام كتير , ما كان حيعرف زاتو يبتديء كلامو من وين ؟
- -- دا لو قدر يتكلم أصلاً , بس أنا والله أظنه لو جيت وسألتو كيف الحال
كان عاين لي من فوق لي تحت كدا ...وأخد ليهو لحظة تفكير وقال لي في الاخير
...الشكية لي الله !!!
- -- والله كلامك صح , يعني حيبدأ ليك كلامو من وين ولا من وين ؟ عندو 20
الف موضوع يتكلم فيها ..
- -- أنا من رأيي يبدأ يتكلم عن هيثم مصطفى...يأخ الموضوع دام جنني أنا
زاتي , خلي السودان !!
- -- هيثم شنو يااخ , والله يا دفع الله يا أخوي أنتو ما عندكم شغلة زاتو ,
كورة شنوا الجاي تتكلم عنها دي وكلام فارغ شنو ...؟؟
- -- يااخي مالك سخنت معاي كدا , أنا بقول ليك السودان كان حيتكلم عنها ...
- -- والله السودان دا لو أتكلم كان سبا ليكم كلكم , يااخي انتو مشكلتكم ما قادرين
تفهموا...البلد دي ما فيها كورة , أحنا شعب بنقدر نتكلم في السياسة وما بنطبق ,
أحنا شعب بنتكلم في الكورة وبعد دا لعيبتنا لو وقفتهم "عراضات في الملعب " والكورة جات ضربتهم ما يصدوا الضربة .
- --- يااخي بتبالغ , بالجد بتبالغ , يعني عايز تقول لي كورة
مافي ؟؟ والهلال والمريخ ديل بيسووا في شنو ..
- --- ديل بيزكرونا بي مغصتنا ووجع بطنا , بيزكرونا بي نظام أكل فاااااااشل
, نظام تحكيم فااااااااشل , نظام تسجيلات لاعبين فااااااااشل , إدارات نوادي
فاااااااااشلة , ولعيبة ....برضو فاشلين , والما فاشل بي مرور الزمن بيبقى فاشل
...
- --- لا حولااااااااااا , أحبطتني , ياأخي انت البيسمعك بيقول ما كنت بتشجع كورة
في يوم وما يشوف أيامك في شغب الملاعب ايام عزك ؟ لا لا والادهي من كدا أنك كنت بتشجع الكورة
قبل كم يوم وكنت متابع ...دا كلو عملوا فيكم هيثم مصطفى ؟
- --- الحكاية ما هيثم مصطفى ولا هلال ومريخ , الوضع براهو كان هش , بس مع
حكاية هيثم دي في هلالاب خلوا التشجيع ومريخاب خلوا كلمة رياضة سودانية زاتو
...أنت عارف أتحاد الكورة دا لو كان عندو دم ...كان لغى الاتحاد دا ...أسمعني يااخي خليني من الكورة دي , فكونا
منها .
- --- شايف أنتقال هيثم مؤثر شديد فيك ..على العموم الكورة خليناها , بس
والله عندي أمل الكورة السودانية ترجع لي أيام زمان..أيام غلبنا البرازيل في
الستينات و أيام ....
- --- (مقاطعاً) ..براك قلتها ...زمااااااااااااااااااااان .....اها الان
الكورة ماتت بس ما لاقين ليها قبر تدفن فيهو ..
- --- أنت عارف يا محجوب..أنت ما بعجبك العجب ...
- --- ما لأني هلالابي بس هههههههه
- --- هههههههه....والله كلامك صح , خليناها الكورة زاتا , أنا ما عارف ليه
أحنا حاصرين نفسنا في مكان ضيق كدا زي الفيران !!
- -- من ياتو ناحية ؟
- ---يعني هسة العالم دا فيهو كم رياضة ممكن تتلعب ؟ انا ما عارف خالينها
كلها وماسكين كورة القدم ليه !!!
- --- دا أول شيء يعجبني الليلة من
كلامك القلتو كلو ...أظنها عقدة عندنا أنو
الما بيلعب كورة معناها ما بيلعب , هسة عليك الله لو خلينا الفرق حقت الكورة
وركزنا مع ابوبكر كاكي ما كان احسن لينا ..يعني الزول دا لو كان دربوهو كويس وعرفوا مشاكلوا شنو... ما
كنا جبنا الميدالية الزهبية في أولمبياد لندن 2012 ؟؟
- --- كنا جبناها وبراااااااااحة , والله كاكي دا مناضل عديل كدا ..الله
يديه العافية بس..
- --- ان شاء الله ...الحكاية ما في كاكي براهو ...وما في الريا ضة بس ...حتى الحالة الاقتصادية بقت قافلة شديد
...
- --- اااااااخ مالك زكرتنا يااخ ..الكورة أرحم والله ..بس أنا سمعت أنو الوضع حيتحسن, خاصة مع زيادة المرتبات الحاصلة دي ...
- --- مرتبات شنو يا زول الزايدة دي؟؟ , من هنا يزيد المرتب من هنا ترتفع
الاسعار بي 85% مرة واحدة ..
- - والله كلامك صح ...خليناهو الاقتصاد زاتو ..
- -- خليهو ..والله أحسن ليك , أنا من أرتفاع الاسعار الحاصلة دي , حلفت
ليهم في البيت أغنية الليمونة دي تاني ما أسمعها ..
- --هههههههههه أنت ما ديكتاتور من زمان , عارفينك انحنا ...
- -- ما دكتاتور بس زول واقعي ...
في هذه اللحظات رفع المؤذن صلاة المغرب ليتوقف الحوار ....
ليست هناك تعليقات:
إرسال تعليق